Taeu peukateun di ureung agam.Macam setelan 'oh jak bak cewek.
Awai peunari swalloow bak jalan.
Watee jumpaan laen geupakek.
.
Ka keunong patu tincu hana ban.
Sileuweu panyang bajee meukipek.
Geukubah gari diyup bak mancang.
Geurental rijang satria bebek.
.
Ban ka meurumpok ngon adek sayang.Tangieng piasan macam geucanek. Sira geurayu mata geupandang. Gata lon idam geukheun dua krek.
.
Laju cut adek hate meuguncang.
Sang-sang lam awan keudeh meutipek.
Di sinan teuka laju lam angan.
Saweub that seunang jantong meudhek-dhek.
.
Mangat bek kobong gaya cut abang.
Bibi geutumpang deungon si kretek.
Meucahoi asap ngon gudang garam.
Adek ka mumang karap teubiet ek.
.
Geu ucap cinta gaseh meulabang.
Cinta dube blang gaseh saboh grek.
Gata sep tari wajah ngon ruman.
Hana bandengan hai bungon anggrek.
.
Walau pih hi jih lagee moto tang.
Han jeut hai rakan tapeugah jelek.
Suwah kheun ceudah meu'ulang-ulang.
Bah pih hi bubrang tapeugah molek.
.
'Oh ban ka jitem jalen hubungan.
Di kamoe agam han meujak meulek.
Peulom yang paleh peuturot syaitan.
Dalam seupot klam pakat duek cewek.
.
Godaan iblih meumacam ragam.
Di sh'ah bak cut bang adek ka sondek.
Teuma adinda di daya saban.
Kanda pelukan hana meukotek.
.
Jeum pih ka jula di teungoh malam.
Senda gurauan rayu ngon ngejek.
Mesra-mesraan kon wayang-wayang.
Dudoe teuka prang cowok ngon cewek.
.
Beude basoka kanda geugulam.
Teuma cut intan granat di pakek.
Bagah that kanda mita sasaran.
Geutembak timang bak asoe lembek.
.
Cut adek saket ka keunong badan.
Darah sep itam dile meurek-rek.
Beudoh ka kanda laju teurajang.
Bagah jak riwang ngon honda bebek.
.
Adek meuseuk-seuh saket hana ban.
Bak karna meuprang bunoe ka rodek.
Jak woe jak gisa dari tempat nyan.
Ie mata linang jile meuprek-prek.
.
Ureung ceumeucah geu-asah parang.
Ngon reunong panyang chot mamplam kolek.
Meugantoe buleun cut adek sayang.
Hawa boh masam mancang teutek-tek.
.
Meugantoe uroe pajoh 'oh malam.
Kicap lam cawan jilhok sikrek-krek.
Geu eu le poma pue ka sinyak nyan.
Ka meunan-meunan sang rab na bayek.
.
Keudeh bak mentri geupublueng rijang.
Peureksa badan peujeut si kodek.?
'Oh watee di lhoh ronsen u dalam.
Leumah cukop trang bet-bit si bayek.
.
Di teuka malee ureung syik sinan.
Wareh ngon taulan gop nyan di ngejek.
Caci ngon maki hina pih saban.
Muka masa nyan wah top ngon triplek.
.
Jalan meureudu karu that kijang.
Kuala simpang di piyoh kantrek.
'Eh noe meumada rika lon karang.
Kisah di dalam ureung meucewek.
.
Bek leupah-leupah jalen hubungan.
Hai bungong keumang bek agam colek.
Bek neubi teupeh cukeh le abang.
Meugoh geupinang gata hai anggrek.
Oleh : Musry
0 Response to "GARA-GARA MEUCEWEK"
Posting Komentar